Pressemelding frå Helse Bergen

Då overtek nemleg Helse Bergen all ambulansekøyring i Bergen kommune, og har med det overteke alle ambulansestasjonar i den delen av Hordaland som soknar til helseføretaket.
Ambulansetenesta blir delt inn i fem område; sentrum, nord, sør, aust og vest. Alle områda har fleire ambulansestasjonar.

– Samling betyr ikkje sentralisering, understrekar Guttorm Brattebø, leiar for Akuttmedisinsk seksjon i Helse Bergen.

– Med den inndeling i område vi no iverksett trur vi ikkje at det vil bli særleg skilnad i utrykkingstid frå den ordninga vi har i dag.

Han forstår at enkelte er spente på korleis ambulansetenesta vil bli etter omorganiseringa, men forsikrar at tenesta skal halde faglege mål.

– Vi skal bli endå betre og vi skal heile tida sørgje for å fylle den oppgåva vi har, seier han.

Kvalitetsreform
I sentrum har Bergen Brannvesen drive hovuddelen av  ambulansetenesta på vegne av Helse Bergen fram til no. Brattebø meiner samlinga av ambulansetenesta er den største kvalitetsreforma som har skjedd i føretaket si historie.

– Ei av dei største utfordringane i ambulansefaget er at den medisinske utviklinga går så hurtig. På få år har personalet gått frå berre å køyre bil til å gi medisinar og i stor grad gjere avanserte undersøkingar ute i ambulansane. Ved å samle ambulansetenesta får vi ei personalgruppe som utelukkande driv med ambulanse- og akuttmedisin, påpeikar han.

- Dette er hovudårsaka til at Helse Bergen bør drive tenesta i eigen regi.

I tillegg peikar Brattebø på at Helse Bergen sit med det medisinske ansvaret uansett.

– Det vil også bli enklare å drive effektiv utnytting av personalet når Helse Bergen har alle ambulansane sjølve, seier han.

Erfaring frå felten
Frå og med årsskiftet får Helse Bergen om lag 60 nye tilsette innan Akuttmedisinsk seksjon, dei fleste frå Bergen Brannvesen. Til saman vil meir enn 200 tilsette i helseføretaket vere involvert i ambulansetenesta. I tillegg vil rundt  40 arbeide både i ambulansetenesta og i AMK. Dette ser Brattebø som ein stor fordel.

– AMK får personale som har erfaring frå felten, noko som igjen vil gjere AMK betre, seier han.

Brattebø trur òg at ei rotasjonsordning for dei tilsette, med vakter både i sentrum og ved andre ambulansestasjonar, vil gje dei tilsette ei breiare og meir komplett erfaring. I tillegg vil det gjere ambulansetenesta som arbeidsplass endå meir attraktiv og spennande. 

– Samlinga er både eit fagleg og organisatorisk løft, understrekar han.

I samband med omorganiseringa har det blant anna vore gjennomført rettleiarkurs for 22 ambulansearbeidarar. Desse skal spele ein nøkkelrolle i ei målretta og felles satsing for å vidareutvikle kompetansenivået i ambulansetenesta. Frå 2008 vil rettleiarane betjene akuttambulansar i alle område av helseføretaket.

– Det å lære på jobben er kanskje den beste og mest effektive måten å lære på, seier Brattebø.

I tillegg er Helse Bergen den nest største lærebedrifta for ambulansefaget i Noreg, med 18 lærlingar.